Në kuadër të projektit “BE për Zhvillim Ekonomik – Zhvillim Ekonomik Lokal i udhëhequr nga Turizmi me Fokus në Trashëgiminë Kulturore”, më 29 prill u prezantua zyrtarisht pranë administratës vendore të Mallakastrës Strategjia e Marketingut dhe Brandingut të Turizmit për Mallakastrën.

Strategjia është zhvilluar nga ART-ER  nën mbikëqyrjen e Emilia-Romagna Region, në bashkëpunim me ekspertë italianë dhe shqiptarë. Dokumenti bazohet në vizionin, nevojat dhe prioritetet e Bashkisë Mallakastër dhe qytetarëve të saj, dhe do të shërbejë si një instrument udhëzues dhe mbështetës për zhvillimin turistik të zonës.

Si pjesë e Strategjisë, është zhvilluar edhe marka territoriale e Mallakastrës, si një mjet praktik për promovimin e integruar dhe koherent të territorit. Logoja e markës është ndërtuar mbi sugjerimet dhe kontributet e komunitetit lokal dhe përfshin referenca grafike ndaj kombinimit të trashëgimisë kulturore, burimeve natyrore dhe produkteve lokale që e bëjnë Mallakastrën unike: Bylis Archaeological Park dhe Epitaph of Gllavenica, Vjosa River dhe ullinjtë. Slogani i logos, “Living Heritage Landscape”, i referohet një territori ku trashëgimia jetohet çdo ditë përmes peizazheve të formësuara nga puna, memories së ruajtur nga komunitetet dhe marrëdhënieve shoqërore të ndërtuara mbi kujdesin dhe qëndrueshmërinë.

Gjithashtu, në kuadër të prezantimit të Strategjisë, u organizua edhe një trajnim dy-ditor me përfaqësues të administratës vendore dhe aktorë të rëndësishëm lokalë për të mbështetur zbatimin e saj. Trajnimi u fokusua në qasje praktike për promovimin turistik, brandingun e destinacionit, koordinimin ndërmjet aktorëve lokalë dhe menaxhimin e qëndrueshëm të pasurive kulturore dhe natyrore. Sesionet shërbyen gjithashtu si një mundësi e rëndësishme diskutimi dhe shkëmbimi idesh mbi mënyrat konkrete për ta kthyer Strategjinë në veprime praktike që mund të forcojnë ekonominë lokale dhe të rrisin vizibilitetin e Mallakastrës si një destinacion turistik në zhvillim.