Më 12 shkurt 2026, në ambientet e Bashkisë Mallakastër u zhvillua Takimi Nisës i projektit “BE për Zhvillimin Ekonomik – Zhvillim Ekonomik Lokal i Udhëhequr nga Turizmi, me Fokus në Trashëgiminë Kulturore” 

Aktiviteti mblodhi së bashku autoritetet lokale, përfaqësues të Delegacionit të Bashkimit Evropian në Shqipëri, AICS, ART-ER, përfituesit e granteve, operatorë lokalë, ekspertë teknikë dhe anëtarë të komunitetit. Pjesëmarrja e gjerë konfirmoi interesin e lartë për projektin dhe potencialin e tij për ndikim konkret në territor.

Takimi u hap nga Kryetari i Bashkisë Mallakastër z. Qerim Ismaili, i cili theksoi rëndësinë strategjike të kësaj nisme për zhvillimin ekonomik lokal dhe për valorizimin e trashëgimisë së pasur kulturore të zonës.

Përfaqësuesja e Delegacionit të Bashkimit Evropian në Shqipëri znj. Entela Sulka rikonfirmoi angazhimin e BE-së për promovimin e modeleve të zhvillimit ekonomik lokal të qëndrueshëm dhe gjithëpërfshirës, të rrënjosur në kulturë. Ajo nënvizoi gjithashtu rëndësinë e respektimit të rregullave të vizibilitetit të BE-së në të gjitha aktivitetet e projektit.

Team Leader i projektit nga AICS z. Ilir Parangoni prezantoi kuadrin strategjik të iniciativës, duke theksuar turizmin si motor të zhvillimit ekonomik lokal dhe vlerën e shtuar të iniciativave të financuara përmes skemës së granteve. Prej tij u paraqit një panoramë e aktiviteteve të realizuara deri më tani, arritjet kryesore dhe rezultatet e pritshme për vitin 2026.

ART-ER dhe përfituesit prezantojnë Iniciativat e tyre

ART-ER, partner për komponentin e zhvillimit lokal të projektit, prezantoi punën e kryer deri tani, asistencën teknike të ofruar për përfituesit dhe veprimet e planifikuara për vitin 2026, me fokus në konsolidimin e rezultateve dhe qëndrueshmërinë afatgjatë të ndërhyrjeve.

Pesë organizatat përfituese prezantuan iniciativat e tyre, duke paraqitur objektivat, aktivitetet e planifikuara, ndikimin e pritshëm ekonomik dhe social, si dhe përfshirjen e komunitetit lokal. Projektet dëshmuan një lidhje të fortë me territorin dhe një ambicie të qartë për të gjeneruar punësim, për të forcuar zinxhirët lokalë të vlerës dhe për të promovuar trashëgiminë kulturore përmes qasjeve inovative.

Anëtarët e komunitetit morën pjesë aktive në diskutime, duke shfaqur interes të lartë dhe angazhim konstruktiv për ecurinë e mëtejshme të projekteve.

Projektet e financuara përmes granteve do të zbatohen deri në nëntor 2026, duke ofruar kohë të mjaftueshme për realizim cilësor, përfshirje domethënëse të komunitetit dhe arritje të rezultateve të matshme në zhvillimin e territorit

Diskutim strategjik për zhvillimin e turizmit

Pas përfundimit të takimit publik, u zhvillua një takim strategjik ndërmjet AICS, ART-ER dhe Kryetarit të Bashkisë Mallakastër. Diskutimi u fokusua në strategjinë e zhvillimit turistik të territorit dhe në brandbook-un e ri territorial. Takimi forcoi më tej bashkëpunimin ndërmjet AICS dhe Bashkisë Mallakastër dhe konfirmoi angazhimin e përbashkët për të harmonizuar iniciativat e granteve me strategjinë e përgjithshme të territorit. Vëmendje e veçantë iu kushtua koherencës ndërmjet identitetit territorial, komunikimit dhe promovimit turistik.